R5903/R4399
அப்போஸ்தலர் 16:6-15
அந்த ஜெபக்கூட்டத்தில் காணப்பட்ட அநேகம்பேரில் அல்லது கொஞ்சம்பேரில், ஒருவளுடைய இருதயமானது செய்தியை ஏற்றுக்கொள்வதற்குரிய சரியான நிலைமையில் இருந்தது. அவள் லீதியாள் எனும் பெயருள்ள ஸ்திரீயாவாள்; அவள் இரத்தாம்பரம் விற்கிறவளாய் இருந்தாள். அப்போஸ்தலன் பிரவேசிப்பதற்கும், போதிப்பதற்கும் அனுமதிக்கப்படாத ஆசியா மைனரிலுள்ள தியத்தீரா ஊராளாயிருந்தாள். அநேகமாக அவள் பிலிப்பி பட்டணத்தில் தற்காலிகமாய்த் தங்கியிருந்து, அநேகமாக இரத்தாம்பரம் சாயம் அல்லது இரத்தாம்பரம் தோய்த்த துணியினை விற்பனைப்பண்ணிக் கொண்டிருந்திருக்க வேண்டும். இன்றைய காலங்களைக்காட்டிலும் முந்தைய காலங்களிலேயே சாயங்கள் மிகவும் விலையுயர்ந்தவைகளாக இருந்தன மற்றும் அவைகளை எப்படித் தயாரித்திடுவது என்பது இரகசியமானதாய் இருந்தபடியால், அது வருமானம் ஈட்டித் தந்தது. ஆகையால் லீதியாள் நல்ல நிதிநிலைமையுடன் இருந்தாளென அனுமானிக்கப்படுகின்றது. சத்தியம் அவளது இருதயத்தைத் திறந்து, அவளது புரிந்துகொள்ளுதலின் கண்களைப் பிரகாசிப்பிக்கப் பண்ணினது மாத்திரமல்லாமல், “அவளும், அவள் வீட்டாரும்” முழுமையான அர்ப்பணம்பண்ணவும், அந்த அர்ப்பணத்தினைத் தண்ணீர் ஞானஸ்நானத்தின் வாயிலாய் அடையாளப்படுத்திடவும் முற்பட்டு, சத்தியத்திற்கு உடனே கீழ்ப்படிந்தாள்.
தேவபக்தியுள்ள பெற்றோர்கள், இப்படியான தேவபக்தியின் நாட்டமுள்ள பிள்ளைகளைப் பெற்றவர்களாக எப்போதும் காணப்படுவதில்லை. இம்மாதிரியான அநேகம் உதாரணங்கள் வேதவாக்கியங்களில் குறிப்பிடப்பட்டுள்ளது. கர்த்தருக்கு உண்மையாய் அர்ப்பணம் பண்ணியுள்ளவர்களும், அவரது வார்த்தையினால் வழிநடத்தப்படுகிறவர்களுமான பெற்றோர் பொதுவாகவே, அவருடன் ஜீவிப்பவர்கள்மீதும், அவரது பராமரிப்பின்கீழ்க் காணப்படுபவர்கள்மீதும், நல்லச் செல்வாக்குடையவராய் இருப்பார் என்று நமது தனிப்பட்ட அனுபவங்கள்கூட நமக்குக் கற்றுத் தந்துள்ளது. இத்தகைய செல்வாக்கானது ஒவ்வொரு பெற்றோராலும் விரும்பப்பட வேண்டும், இதற்காய் ஜெபிக்கப்பட வேண்டும், அடைய நாடப்பட வேண்டும். ஆனால் இந்தச் செல்வாக்கானது கவனமுள்ள, எச்சரிக்கையுள்ள வார்த்தை மற்றும் செய்கையின்மூலமாக மாத்திரமே அடையப்படமுடியும். வார்த்தைகள் மற்றும் செய்கைகளானது கட்டுப்பாட்டின்கீழ்க் காணப்படுதல் என்பது, இருதயத்தினுடைய ஒவ்வொரு எண்ணங்களும், தேவ சித்தத்திற்குச் சிறைப்படுத்தப்பட்டிருப்பதைக் குறிக்கின்றதாய் இருக்கும்.
எனினும் பிள்ளைகள் பெற்றோரின் அறிவுரையைக் கேட்டு வளரும் வயதைத் தாண்டும்வரையிலும் சத்தியத்தைப் புரிந்துகொள்ளாதவர்களாகவும், தங்கள் பொறுப்புகளை அடையாளம் கண்டுகொள்ளாதவர்களாகவும் காணப்பட்ட பெற்றோர்கள், ஒருவேளை பிள்ளைகள் தங்களையும், தங்களது மத நம்பிக்கைகளையும் மதிக்காதவர்களாய் இருக்கையில், இதனிமித்தம் தங்களையே மிகவும் கடினமாய்க் கடிந்துகொள்ளக்கூடாது. மாறாக கர்த்தருக்குச் சூழ்நிலைகள் என்னவென்று தெரியும் எனவும், அவரைத் தாங்கள் அறிய வந்த பிற்பாடு – தங்கள் ஜீவியங்கள் குறித்தும், கர்த்தருக்கேற்ற சிட்சையிலும், போதனையிலும் பிள்ளைகளைப் பயிற்றுவிப்பது குறித்தும், அவரது வார்த்தைகளில் காணப்படும் அறிவுரைகளைப் புரிந்துகொள்வதற்கான வாய்ப்பினைப் பெற்றப் பிற்பாடு – அவர்கள் செய்த அல்லது செய்யத் தவறின விஷயங்களுக்கு அவர்களைக் கர்த்தர் பொறுப்பாளியாய்ப் பார்ப்பார் எனவும் இந்தப் பெற்றோர்கள் நினைவில்கொண்டிருக்க வேண்டும் (எபேசியர் 6:4).