2 நாளாகமம்34:1-13

“நீ உன் வாலிபப்பிராயத்திலே உன் சிருஷ்டிகரை நினை.” ( பிரசங்கி 12:1 )

அரியணைக்கு எட்டு வயதில் வந்தமர்ந்தவுடன், தன் மனம் மற்றும் இருதயத்தை மதியீனமானவைகள் மீது மற்றும் தற்பெருமைக்கு அடுத்தவைகள் மீது செலுத்திடுவதற்குப் பதிலாக, யோசியா, தனது பதினாறாவது வயதில் சரியான இராஜாவாக தான் ஆண்டுவந்த இராஜ்யம் தொடர்புடைய விஷயத்தில் தேவனுடைய சித்தத்தை அறியவும், அதைச் செய்யவும் ஊக்கமாய் நாடத்துவங்கினது குறிப்பிடத்தக்க காரியமாகும். இவரது இருபதாவது வயதில், இவரது தீர்மானங்கள் / நம்பிக்கைகள் ஸ்திரமடைந்தது மற்றும் யூதேயா இராஜ்யத்தில் இவர் முழுமையான சீர்த்திருத்தத்தைக் கொண்டுவரத்துவங்கினார் மற்றும் இதே சீர்த்திருத்தத்தை தன் இராஜ்யபாரத்திற்கும் தாண்டி, மனாசே, எப்பிராயீம், சிமியோன் மற்றும் நப்தலியின் பாகங்களிலும் செய்திட்டார். விக்கிரகங்களையும், அதனோடு உள்ள மற்ற பல்வேறு உடைமைகளையும் அழித்துப்போட இவர் கட்டளையிட்டதோடு மாத்திரமல்லாமல், இவரே நேரில் [R3607 : page 236] சென்றும் இக்காரியங்களை மேற்பார்வையிட்டார் – இதற்குரிய பொறுப்பினை இவர் ஒப்படைத்திருந்ததான அதிகாரிகளோடுகூட இவரும், விக்கிரகங்கள் முற்றும் முழுமையாக அழிக்கப்படுகின்றதா என்று நேரில் சென்று பார்வையிட்டார். இவரின் இந்தச் சீர்த்திருத்த வேலையைக்குறித்தும், பெத்தேலில் இவர் பாகாலின் பலிபீடத்தில் பாகாலுடைய ஆசாரியர்களின் எலும்புகளைச் சுட்டெரித்துப்போடுவது குறித்தும் பல வருடங்களுக்கு முன்னதாகவே தீர்க்கத்தரிசனம் உரைக்கப்பட்டிருந்தது (1 இராஜாக்கள் 13:1-3; 2 இராஜாக்கள் 23:15-17).

யோசியாவின் மற்றும் யூத யுகத்தினுடைய மற்றச் சீர்த்திருத்தவாதிகளினுடைய செய்கைகளானது – அதாவது பல்லாயிரம் பாகாலின் ஆசாரியர்களை வெட்டிப்போட வைத்திட்டதான எலியாவின் செய்கைகளானது, அநேகம் உண்மையுள்ள கிறிஸ்தவர்களுடைய மனங்களைக் குழப்பத்திற்குள்ளாக்கி, பொதுப்படையான அல்லது தனிப்பட்ட விஷயத்தில் வன்முறை செயல்களில் இறங்க ஏதுவாக்கிற்று; ஆனால் இது இந்தச் சுவிசேஷயுகத்தினுடைய ஆவிக்கு முற்றிலும் எதிர்மாறானதாகும். இது விஷயத்தில் சரியான புரிந்துகொள்ளுதலைப் பெற்றுக்கொள்வதற்கு – யூத தேசமானது திவ்விய ஏற்பாட்டின்படி, உலகத்திலுள்ள தேவனுடைய நியாயத்தீர்ப்பினை அடையாளப்படுத்துகிறதாய் இருப்பதை நாம் நினைவில்கொள்வது அவசியமாகும்; நியாயப்பிரமாணத்தின் கீழ் இஸ்ரயேலின் ஒவ்வொரு இராஜா மீதும், அந்தத் தேசத்தின்மீதும், தனிநபர்கள் மீதும்கூடச் சில விதங்களில் வன்மையாக விக்கிரக ஆராதனையை எதிர்ப்பதற்குரிய ஒரு குறிப்பிட்ட பொறுப்புக் காணப்பட்டது, காரணம் அந்த இராஜ்யபாரமானது தேவனையும், அவரது நீதியுள்ள ஆளுகையையும் அடையாளப்படுத்தினதாய் இருப்பதை நாம் நினைவில்கொள்வது அவசியமாகும். யூத யுகத்தினுடைய முடிவில், மாம்சீக இஸ்ரயேலர்கள் ஒரு ஜாதியாராகத் தெய்வீகத் தயவினின்று அறுபுண்டுப்போனபோது, மேற்கூறப்பட்டுள்ள விஷயங்களை நிர்வகிக்கத்தக்கதாக அந்த ஜனங்களுக்குக் கொடுக்கப்பட்டதான அனைத்துப் பிரமாணங்களும், சட்டங்களும் முடிவிற்கு வந்தது, இரத்துச் செய்யப்பட்டது, செல்லுபடியாகாமல் போனது. இது, அவர்களை நோக்கி நமது கர்த்தர்: “உங்கள் வீடு உங்களுக்குப் பாழாக்கிவிடப்படும்” என்று கூறினதுபோன்று ஆயிற்று (மத்தேயு 23:38).

பெந்தெகொஸ்தே நாளில் ஆவிக்குரிய இஸ்ரயேலர் ஏற்படுத்தப்பட்டதோடுகூட, ஒரு புதிய உடன்படிக்கை, ஒரு புதிய உறவு, புதிய சட்டதிட்டங்கள் செயலாக்கத்தில் வந்தது. ஆவிக்குரிய இஸ்ரயேலர்கள் பூலோக ஆயுதங்கள்கொண்டு யுத்தம்பண்ணிடக்கூடாது. அவர்களுடைய யுத்தம் அவரவர் சொந்த இருதயத்திற்குள்ளாகக் காணப்பட வேண்டும்… மாம்சத்தின் ஆசைகள், எதிராளியானவனின் தந்திரங்கள் மற்றும் உலகத்தினுடைய ஆவிக்கு எதிராய் விசுவாசத்தின் நல்லப் போராட்டத்தினைப் போராடிட வேண்டும். ஒவ்வொரு இருதயத்திற்கும் கைப்பற்றிடுவதற்குரிய சொந்த இடங்கள் உண்டு, அப்புறப்படுத்திடுவதற்கு விக்கிரகங்கள் உண்டு; ஒவ்வொரு இருதயமும், மாம்ச சரீரத்தினுடைய எல்லைகள் அனைத்திலும், நமது தேவனாகிய கர்த்தருக்கான தொழுதுகொள்ளுதலை, ஆராதனையை, சேவித்தலை நிலைநாட்டிடுவதற்கு எதிர்ப்பார்க்கப்படுகின்றது. உலகத்தின் காரியங்களைப் பொறுத்தமட்டில், அவர்களோடு நமக்கு எந்தத் தொடர்பும் இல்லை என்று நமக்குத் தெளிவாகச் சுட்டிக்காண்பிக்கப்பட்டுள்ளது. “நான் உலகத்தானல்லாததுபோல, அவர்களும் உலகத்தாரல்ல” (யோவான் 17:16). உலகம் தற்போது புறஜாதிகளினுடைய கரங்களில் காணப்படுகின்றது மற்றும் இது தெய்வீக அனுமதியின் பேரிலேயே ஆகும். புதுச்சிருஷ்டிகள், ஆவிக்குரிய இஸ்ரயேலர்கள் தங்களை உலகத்திடமிருந்து பிரித்து வைத்துக்கொள்ள வேண்டும் மற்றும் இவர்களது மனசாட்சியானது இவர்களை அனுமதித்திடும் அளவிற்கு, இவர்கள் அதிகாரங்களுக்குக் கீழ்ப்பட்டிருக்க வேண்டும். ஏனெனில் இந்த அதிகாரங்கள் தேவனாலே அனுமதிக்கப்பட்டவைகளேயாகும். ஆனால் அதற்கென்று இவர்கள் தங்கள் இருதயத்திலுள்ள அதிகாரங்களினுடைய செய்கைகள் அனைத்திற்கும் இணங்கிட வேண்டும் என்று அர்த்தமாகாது – ஒருவேளை இணங்கிடுவார்களானால், இவர்கள் மிகவும் துக்கம் அடைபவர்களாய் இருப்பார்கள்; ஆனாலும் இவர்கள் அனுபவித்திடும் துக்கம் அல்லது எதிர்ப்பு அல்லது பாடுகள் அல்லது பொறுமை மற்றும் விசுவாசத்திற்கான சோதனைகள் எதுவாயினும், அது – இவர்களை எதிர்கால இராஜ்யத்தினுடைய நிலைமைகளுக்கு ஆயத்தம்பண்ணுவதற்குரிய கர்த்தருடைய மெருகூட்டிடும், தகுதிப்படுத்திடும் செயல்முறையாகவும் கருதப்பட வேண்டும்; மேலும் அது – இவர்களைத் தமக்கும், நீதிக்கும் அதிகமதிகமாய் நேர்மையுள்ளவர்களாகவும் மற்றும் தாழ்மையுள்ளவர்களாகவும், பொறுமையுள்ளவர்களாகவும் ஆக்கிடத்தக்கதாகவும், எதிர்காலத்தில் கர்த்தருடைய செம்மையான வழிகளில் உலகினை ஆசீர்வதிப்பதும், ஆளுகைச்செய்வதும், நியாயந்தீர்ப்பதும், சீர்த்தூக்கிவிடுவதும், ஊக்குவிப்பதுமான மகா வேலைக்கு, இவர்கள் நன்கு தகுதியடைந்தவர்களாகக் காணப்படத்தக்கதாகவும் ஆக்கிடும் அவரது செயல்முறையாகவும் கருதப்பட வேண்டும்.

தாயின் செல்வாக்கு – SUB HEADING

வேறொரு பாடத்தில் எப்படி ஒரு நல்லத் தகப்பன், ஒரு துன்மார்க்கமான குமாரனைப் பெற்றிருந்தார் என்பதையும், மேலும் அது அந்தத் தகப்பன் மற்றக் காரியங்களில் எல்லாம் எவ்வளவுதான் வைராக்கியமும், உண்மையுள்ளவராக இருப்பினும், பெற்றோருக்குரிய தாலந்துகளில் தனக்கிருக்கும் குறைபாடு குறித்து என்னதான் காரணங்கள் காட்டினாலும், அவர் தகப்பனுக்குரிய தன் கடமைகளில் உண்மையற்று இருந்ததை, கடமை தவறியதைச் சுட்டிக்காட்டினது என்பதையும் பார்த்தோம். நம்முடைய இன்றைய பாடம் நேர்மாறானதாகக் காணப்பட்டு… துன்மார்க்கமான தகப்பன் ஒருவனுடைய நல்லக் குமாரனைக்குறித்துக் காண்பித்துத் தருகின்றதாய் இருக்கும்; மேலும் இது ஒரு நல்லத் தாயார் இருந்துள்ளதைச் சுட்டிக்காட்டுகின்றது என்று அனுமானிப்பது முற்றிலும் நியாயமானதாக எங்களுக்குத் தோன்றுகின்றது. ஏனெனில் துன்மார்க்கமான ஒரு தகப்பனும், துன்மார்க்கமான ஒரு தாயும், ஒரு நல்லக் குமாரனை வளர்த்து உருவாக்கினார்கள் என்பது முற்றிலும் சாத்தியமற்றதாகும். ஆகையால் யோசியாவின் தாயார், ஒரு தேவபக்தியுள்ள ஸ்திரீ என்று எடுத்துக்கொள்வது நியாயமானதென நாங்கள் எண்ணுகின்றோம்.

தாய் மனம் வைத்தால், அவள் தன்முன் கொண்டிருக்கும் உயர்ந்த கொள்கைகளுக்கேற்ப தன் பிள்ளைகளைப் பயிற்றுவித்து வளர்ப்பதில் தன் சக்தியினைப் பிரயோகிக்கத்தக்கதாக, மனித குடும்பத்திலுள்ள தாய்மார்களைத் தொழில் மற்றும் அரசியலுடைய சண்டைச்சச்சரவுகளினின்றும், சுயநலத்தினிடமிருந்தும் அதிகளவில் பிரித்து வைத்துள்ளதான தெய்வீக ஏற்பாடானது, மனுஷஜாதிக்குப் பல்வேறு வழிகளில் மாபெரும் ஆசீர்வாதமாகவே இருந்துள்ளது என்பதில் ஐயமில்லை. ஐயத்திற்கிடமின்றி இது எல்லை மீறின சுயநலம் மற்றும் பாவத்திற்குள் வேகமாய்ச் சீரழிந்து போவதையும் தடுத்திருக்கின்றது மற்றும் எங்கெல்லாம் இயற்கையான இந்த ஏற்பாடு குறுக்கிடப்பட்டுள்ளதோ, அது அங்குக் குழந்தைகளுக்கு ஏறக்குறைய பாதகமாகவே இருந்துள்ளது என்பதிலும் உறுதியே.

ஓ! உலகத்தின் தாய்மார்கள் கர்த்தரினால் தங்களது கரங்களில் வைக்கப்பட்டுள்ள நன்மைக்கேதுவான மகா வல்லமையினை அறிந்துகொள்வார்களாக! தொட்டில் ஆட்டும் கைகள்தான், உலகத்தை ஆளும் கைகளாகும் என்பதை அவர்கள் உணர்ந்துகொள்வார்களாக! இதை உணர்ந்துகொள்வதும், தங்கள் கைகளில் தேவனால் இவ்விதம் வைக்கப்பட்டுள்ள வாய்ப்பினைப் பயன்படுத்திடுவதும், தெய்வீக ஏற்பாட்டிற்கு முறையாய் இணங்குவதாக இருக்கும் மற்றும் இது அரசியல், தொழில் முதலானவைகளில் பங்குபெறுவதற்கான இலட்சியங்களை இவர்களிடத்திலிருந்து முற்றிலும் எடுத்துப்போட்டுவிடும். மற்றப் பாடப்பொருள் விஷயத்தில் போலவே, இந்த ஒரு பாடப்பொருள் மீதான கர்த்தருடைய வார்த்தைகளிலுள்ள ஆலோசனைகளும், தெய்வீக வழிநடத்துதலினுடைய ஏற்பாடுகளும் கவனிக்கப்படாமல் போவதே [R3608 : page 236] பிரச்சனையாய் இருக்கின்றது. பாவப்பட்ட உலகமானது தனக்குத் தெரிந்ததற்கேற்ப அநேகமாகச் செய்துகொண்டுவருகின்றது; அதுவும் இயற்கையான சுபாவ உள்ளுணர்வை அங்கீகரித்து, அது நேர்மையாய் நடைமுறைப்படுத்தப்படுவதற்கு ஏற்ப, சிலர் சிறப்பாகவும், சிலர் மோசமாகவும் செய்துகொண்டுவருகின்றனர்.

கிறிஸ்தவ தாய்மார்கள், அதிலும் விசேஷமாகத் தெய்வீகக் குணலட்சணம் மற்றும் திட்டம் குறித்து அதிகம் புரிந்துகொள்ளத்தக்கதாகத் தங்கள் புரிந்துகொள்ளுதலின் கண்களைத் திறக்கப்பெற்றவர்கள், தங்கள் பிள்ளைகளைப் பயிற்றுவிப்பதிலுள்ள தங்களுக்கான சிலாக்கியங்களைத் தங்களுக்கான பொறுப்புகளைப் பயன்படுத்திடுவதில் துரிதமாய்க் காணப்பட வேண்டும். இவ்வேலையானது சிறியது என்றோ, முக்கியத்துவமற்றது என்றோ, ஆற்றலற்றது என்றோ யாரும் எண்ணிட வேண்டாம். தேவனுக்கும், அவரது வார்த்தைகளுக்கும், தங்கள் பெற்றோர்களுக்கும், பென்னான பிரமாணத்திற்கும், அதாவது தங்கள் விளையாட்டு நண்பர்கள், அயலார்களிடத்தில் நடந்துகொள்ளும் விஷயத்தில் பொன்னான பிரமாணத்திற்கும் கீழ்ப்படியவும், மரியாதைக்கொண்டிருக்கவும் மற்றும் ஒழுங்காய் இருக்கவும், கட்டுப்பாடுகளுக்கு உட்பட்டு இருக்கவும், காலந்தவறாமல் இருக்கவும், ஒழுக்கமாக இருக்கவும், உண்மையாய் இருக்கவும் முறையாய்ப் பயிற்றுவிக்கப்பட்டுள்ள ஒவ்வொரு குமாரனும், ஒவ்வொரு குமாரத்தியும் . . . ஜீவியத்தில் அவன் மற்றும் அவளது சொந்த ஆசீர்வாதத்திற்கு ஆயத்தமாக்கப்பட்டவர்களாய் மாத்திரம் இராமல், இன்னுமாக மற்றச் சிறுவர்களுக்கும், சிறுமிகளுக்கும், புருஷருக்கும், ஸ்திரீக்கும் முன்மாதிரியாகவும், ஆசீர்வாதமாகவும் இருப்பதற்கும்கூட ஆயத்தமாய் இருப்பார்கள். இப்படியாக ஒவ்வொரு தாயினுடைய செல்வாக்கானது நாட்கள் செல்லச்செல்ல விரிவடைகின்றது மற்றும் பெருகுகின்றது.
[R3608 : page 237]

ஒருவேளை இத்தகைய விரும்பத்தக்கச் செல்வாக்குகளானது குடும்ப வட்டாரத்தைத் தாண்டி வெளியே உள்ளவர்களுக்காய்ச் செயல்படுத்தப்படவில்லை என்றாலும், குழந்தைகளை முறையே பயிற்றுவிப்பது என்பது, குடும்பத்திற்கு மிகவும் அவசியமானதாகும் – குடும்பத்தின் பொதுவான சமாதானத்திற்கும், சௌகரியத்திற்கும், அன்பிற்கும் மிகவும் அவசியமானதாகும். தகப்பன் குடும்பத்தின் தலைவனெனத் தன் பொறுப்பினைத் தட்டிக்கிழிக்காதவராகவும், இவரோடுகூட உடன்வேலையாளாகவும், வாழ்க்கைத் துணையாகவும் தாயானவள் ஊக்கமாய் ஒத்துழைத்தாலும்… குடும்பத்தின் தேவைகளைச் சந்திப்பதற்கென உழைக்கும் தகப்பன் குழந்தைகளுடன் அதிகம் தொடர்பில் இராததால், குழந்தைகளைப் பயிற்றுவிப்பதிலுள்ள பொறுப்பினுடைய பெரும்பகுதி தாய் மேலேயே காணப்படுகின்றது. ஒருவேளை தாயானவள் மாத்திரம் கிருபையின் பிள்ளையாக இருக்கும் பட்சத்தில், அவள் கணவன் அனுமதிக்கும் அளவுக்குத்தக்கதாக இந்த முழுப்பொறுப்பும் அவள் தோள்கள்மீதே காணப்படும் மற்றும் அவளுக்கு
இருக்கும் ஒரே உதவியும், வழிநடத்துதலும் கர்த்தர் அருளிடும் உதவியும், வழிநடத்துதலும் மாத்திரமேயாகும். அந்தோ பரிதாபம்! ஒழுங்கும், கட்டுப்பாடும் இல்லாத அநேகம் குடும்பங்கள், உண்மையில் குடும்பங்களே அல்ல. அன்பு மற்றும் செல்லம் காட்டுதல்குறித்த தவறான அபிப்பிராயங்கள் உடைய அநேகம் பெற்றோர்கள் – தேவனுக்கும், பெற்றோருக்கும், மற்றவர்களுடைய நலன்கள், உரிமைகளுக்குமான உரிய மரியாதை காட்டாத விதங்களில் பிள்ளைகள் வளருவதற்கு அனுமதித்துவிடுகின்றனர். இதுவே உலகமெங்கிலும் வெளிப்படும் ஒழுங்கின்மையினுடைய அதிகரிப்பிற்கும், கட்டுபாடற்ற ஜீவியத்திற்குமான இரகசியமாகும். உண்மையில் ஆச்சரியம் என்னவெனில்… விதிமுறைகளும், ஒழுங்கும், அன்பும், இரக்கமும் இல்லாத குடும்பங்களையுடைய உலகமானது, அது இருக்க வேண்டிய மோசமான நிலைமையைக் காட்டிலும், இப்பொழுது குறைந்த மோசமான நிலைமையிலேயே காணப்படுகின்றது.

உன் வாலிபப் பிராயத்தில் – SUB HEADING

நம்முடைய பாடத்தினுடைய ஆதார வசனமானது, ஒவ்வொரு குடும்பங்களிலும் முக்கியமானதாய்க் கருதப்பட வேண்டும். தன் சிருஷ்டிகரை நினைவுகூருவதற்கும், மதிப்பதற்கும் கற்றுக்கொண்டுள்ள பிள்ளை – தன் சொந்த அபூரணங்களைக்குறித்து, இது எவ்வாறு வந்தது என்பது குறித்தும், தன்மீதும், உலகம் அனைத்தின்மீதும் காணப்படும் மரணத் தண்டனையானது பூமிக்குரிய வளங்கள் / நம்பிக்கைகள் அனைத்தையும் அழித்துப்போட்டது என்பது குறித்தும் அறிந்துகொண்டுள்ள பிள்ளை – சாபத்தினின்றுள்ள இரட்சிப்பைக்குறித்த செய்தியை ஏற்றுக்கொள்வதற்கும், தேவன் எப்படித் தம்முடைய அன்பினால் இயேசுவை மாபெரும் மீட்பராகக் கொடுத்தருளியுள்ளார் என்பதையும், இவரது மரணம் பெற்றுத் தந்ததான விடுதலையானது, மனித குடும்பத்தினுடைய ஒவ்வொரு அங்கத்தினன்மீதும் சீக்கிரமாய்க் கடந்துவரும் என்பதையும் ஏற்றுக்கொள்வதற்கும் ஆயத்தமாயிருப்பான். தேவனுக்கு மரியாதைக் கொண்டிருப்பதன் இயல்பான விளைவுதான், பெற்றோருக்கு மரியாதைக் கொண்டிருப்பதாகும்.

இந்தப் பத்திரிக்கையினுடைய இதழாசிரியர் (சகோதரர் ரசல் தன்னைக்குறித்துப் பதிவு செய்கின்றார்) கிறிஸ்தவ பெற்றோர்களுக்குப் பிறப்பதற்கும், கிறிஸ்தவ செல்வாக்கின் கீழ்ப்பேணி வளர்க்கப்படுவதற்குமுரிய நற்சிலாக்கியம் பெற்றவராய் இருந்தார் மற்றும் இப்படியாகத் தேவனுடைய வழிநடத்துதலினால் ஜீவியத்தின் ஆரம்பக்காலங்களிலேயே கர்த்தருக்கு அர்ப்பணம்பண்ணிடுவதற்கான சிலாக்கியத்தினையும், ஆசீர்வாதத்தினையும் காணும்படிக்கு வழிநடத்தப்பட்டார். இப்படியாக அவர் தப்புவிக்கப்பட்டதான அநேகம் படுகுழிகளையும், கண்ணிகளையும் வேதனையான அனுபவங்களையும் மற்றும் இப்படியாக அவர் அடைந்திட்டதான மாபெரும் ஆசீர்வாதங்களையும் மிகத் தெளிவாய் அவரால் இப்பொழுது ஜீவியத்தைத் திரும்பிப்பார்க்கையில் காணமுடிகின்றது. தேவனுடைய கிருபையினால் பாவத்தினின்று விலகியோடி, மாபெரும் ஜீவன் கொடுப்பவரைப் பற்றிப்பிடித்து, அவர் கரத்தை உறுதியாய்ப் பிடித்து, அவர் அடிச்சுவட்டில் நடக்க நாடிடும் அனைவரின்மீதும் இதழாசிரியரின் அனுதாபங்கள் காணப்படுகின்றது. இத்தகையவர்கள் அனைவரோடுகூட இதழாசிரியர் களிகூருகின்றார்; எனினும் பொல்லாத நாட்கள் வருமுன்னும்… இளமைப் பருவத்துக்குரிய இன்பக் களியாட்டங்களில் மூழ்கி, பின்னர்க் கசப்பான அனுபவங்களை அனுபவிப்பதற்கு முன்னும் … ஜீவியத்தினுடைய ஆரம்பக்காலங்களிலேயே கர்த்தரை நாடித்தேடுகிறவர்கள்மீது இதழாசிரியர் விசேஷமாய் அக்கறைக்கொண்டுள்ளார். இந்தப் பத்திரிக்கையினுடைய வாலிப வாசகர்கள் அனைவரிடத்திலும்… அதிலும் விசேஷமாகத் தேவனுடைய அன்பு தங்கள் இருதயங்களைக் கட்டி இழுப்பதை உணர்ந்தவர்களாகவும், அந்த இழுக்கும் வல்லமைக்கு இணங்கி, நம்முடைய இரட்சிப்பின் அதிபதியினுடைய அடிச்சுவடுகளில் – அதாவது சுயத்தை வெறுத்தல் எனும் அடிச்சுவட்டில், சுயத்தை பலிசெலுத்துதல் எனும் அடிச்சுவட்டில், மகிமையின்மேல் மகிமைக்கு வழிநடத்துகின்ற அடிச்சுவட்டில் – நடப்பதற்கென்று தங்களை முழுமையாய் அர்ப்பணம் பண்ணியுள்ளவர்களாகிய வாலிபர்கள் அனைவரிடத்திலும் நாம் ஆழமான அக்கறைக்கொண்டிருக்கின்றோம். அத்தகையவர்கள் அனைவருக்கும் நாம் கர்த்தருக்குள் உற்சாகமான வாழ்த்துதல்களைத் தெரிவிக்கின்றோம் – ஏற்கெனவே அடியெடுத்து நடந்துவந்துள்ள அடிகளுக்காய்ப் பாராட்டுத் தெரிவிக்கின்றோம் மற்றும் இனிமேலும் அடியெடுத்து நடக்கவேண்டியவைகளுக்காய் வாழ்த்துச் சொல்கின்றோம்.